Виктор Орбанның күйеу баласы KASE-нің номиналды акционері болуы мүмкін

Венгриялық миллионер Иштван Тиборц австриялық Raiffeisen Bank International(RBI) банк тобының ресейлік бөлімшесін сатып алуы мүмкін. Бұл туралы 21 ақпан, жұма күні австриялық Der Standard газеті жазды, деп хабарлайды Orda.kz. 

Басылым мәліметінше, Raiffeisen Bank International басшылығы Виктор Орбанның күйеу баласына ресейлік бизнесті сату жолдарын талқылауда. Алайда Венгрия тарапы бұл ақпаратты жоққа шығарды. 

Алайда  RBI мен Тиборец арасында «байыпты келіссөздер» жүріп жатқаны туралы ақпарат әлі де тарап жатыр. Келіссөзге орталық банк пен Ресей Федерациясы президенті әкімшілігінің өкілдері де қатысуы мүмкін. Бұл мәселені Венадағы RBI бақылау кеңесі талқылаған. Отырысты Raiffeisen-Holding Niederösterreich Wien инвестициялық холдингінің басшысы Эрвин Хамезедер басқарды.

38 жастағы Тиборц - Венгриядағы ең бай адамдардың бірі. Венгриялық Forbes оның байлығын 151,5 миллиард форинтке (шамамен 370 миллион еуро) бағалайды. Ол 2013 жылы премьер - министрдің үлкен қызы Рахель Орбанға үйленген.

2024 жылдың маусымында KASE акцияларының 13,1% иеленген Мәскеу биржасы АҚШ-тың санкцияларына ұшырады. Сол жылдың қазан айында KASE Мосбиржаның акционерлер құрамынан шығатыны және ресейлік сауда алаңымен қарым-қатынастың тоқтатылатыны туралы хабарлады. 

2025 жылғы 1 қаңтардағы жағдай бойынша KASE акцияларының 13,1% номиналды ұстаушысы ресейлік Raiffeisen Bank International(RBI) болды.