Викрам Рузахунов қалай азапталғаны туралы толық айтып берді

Алматы қаласында ұсталған алғашқы террористердің бірі деп көрсетіліп, артынша Қырғыз Республикасының билігі мен халқының үн қатуы арқылы босатылған музыкант Викрам Рузахунов басынан өткен жағдайларды толық баяндап берді.

Ол музыкадан бөлек, ІТ бизнеспен айналысатынын, Алматыға серіктестерімен болашақ жобаны талқылау мақсатында келгенін айтты. 4 қаңтар күні митинг басталған. Жергілікті достарының кеңесіне сүйенген Рузахунов 4, 5 және 6 қаңтар күндері ешқайда шықпаған. Ахуал қиындап, отбасымен байланыса алмаған ол Бішкекке қайтуға шешім қабылдайды.

7 қаңтар күні ол «Сайран» автовокзалына келген. Көлікте одан бөлек тағы үш жолаушы болған. Алматы–Бішкек тас жолында Самсы ауылының тұсында блок-бекетте оларды тоқтатып, барлығын тексерген.  

Рузахуновтың айтуынша, қырғыз паспортын көрген тәртіп сақшылары оны көліктен түсіріп, басынан ұрып, алып кеткен.

– Олар менің барлық заттарымды тексерді, әрқайсысын қарады, Алматыда ұрладың, мародерсің деп айыптады. Менің телефонымда бұл киімдермен түскен суреттерім митингіге дейін түсірілгеніне қарамастан, соққыға жықты. Артынша мені басқа арнайы жасақ өкіліне берді, ол да мені соққының астына алды. Ол жұдырықпен, резеңке шоқпармен ұрды. Тізерлетіп отырғызып, автомат ұңғысын басыма тақады. Алматыға неге келгенімді сұрап, мародерсің деп айыптады.  Күн суық еді, қар жауып тұрған. Шешіндіріп, тек футболка мен сырт киіміме ғана рұқсат берді. Сарайға алып келгенде онда менен бөлек 30 шақты адам болды. Бізді сарайда күн қарайғанша ұстады. Осы уақыт аралығында біз тұтқынға түскен адамдарша отырдық. Автобустарды тексеріп, одан ұстаған ер адамдарды бізге қосты. Менімен бірге қазақтар, тәжіктер, өзбектер, дүнгендер болды.

– Кешкілік бізді шығарып, қай елдің азаматтары екенімізді анықтай бастады. Мен және тағы төрт қырғыз азаматы болды. Кейін оларды да жіберген. Бізді уақытша ұстау изоляторына қамады. Камерада бізді азаптап, Алматыға бұзақылықты ұйымдастыруға және мародерлік үшін келгеніміз туралы мойындауды талап етті. Кейде камераға кіріп, жайдан жай ұратын. Тергеуге дейін және кейін де жиі соққыға жықты. Жеке камераларға алып барып, ол жақта да күш қолданды. Жұдырықпен ұрып, аяқпен теуіп, автомат тақап, омыртқа тұсымнан автомат дүмімен ұрды. Тіпті, ағаш сынғанша ағашпен де ұрды. Іш киімге дейін шешіндіріп, еденге аяқ-қолымызды төрт жаққа жіберткізіп жатқызды да тепкіге алды, артынша автоматпен ұрды. Осының бәрі митингіде болғанымды, тонауға қатысқанымды мойындату үшін жасалды. Адам өлтірдің, кісі бауыздадың, дүкендерді тонадың деп айыптады. Мен камерада 7 қаңтардан 10 қаңтарға дейін болдым. Бір мәрте нан берді, күніне бір рет ыстық тамақ берді, - деді музыкант.

«Мойындау» видеосын 8 қаңтар күні жазыпты.

– 8 қаңтар күні кезекті тергеуден соң камераға мойындайтын бір адам қажет екенін айтты. Сосын мені бөлек камераға апарып, «не қазір керек нәрсені айтасың, немесе біз ұруды тоқтатпаймыз» деді. Мен мойындаған жағдайда қандай жаза күтіп тұрғанын сұрадым. Олар бәрін айтсам мені еліме депортациялайтынын айтты, мен келістім. Мен өз сөздерін қағазға жазып беруін сұрап едім «осылай есіңде сақта» деп жауап берді. Бірнеше қайталап мәтінді жаттадым. Сосын олар журналист алып келді. Мен журналист сценарийден тыс сұрақтар қойса не болатынын сұрап едім, «алаңдама» деп жауап берді. Сұхбат жазу барысында сценарийден тыс сұрақтар болғанда мен кадрдан тыс бақылап тұрған адамға қарадым, ол маған не айту керектігін айтып тұрды, мен соны айттым, - деді Рузахунов.

Оның айтуынша, қамауда болған күндері әлемде, сыртта не болып жатқанынан бейхабар болыпты.

– Мен сыртта не болып жатқанын біле алмадым. Бізге бас көтеруге рұқсат бермеді. 10 қаңтар күні мені кезекті тергеуге алып келіп, консул келгенін айтты және қағаздарды толтырып, түзу сұрақтар қоя бастады, - деді ол.

Рузахунов үш күн бойы тәртіп сақшылары оның жеке басын анықтауға тырыспағанын айтады.

– Олар менің танымал музыкант екенімді айтқаныма сенбеді, мазақ қылды. Интернетке атымды жазуын сұрадым, олар мұны істемеді, - деді ол.

Рузахунов Бішкекке келгеннен кейін біршама уақыт өз-өзіне келе алмағанын және өзінің физикалық жағдайына қарай алмағанын айтты.

Кейін тексеру кезінде оның қабырғасының сынғаны, бас сүйегіне зақым келгені, төс сүйегінің жарақаты және басқа да көптеген сыртқы жарақаттар алғаны анықталған. Бір айдан бері ем алып жатқан ол әлі толық айықпағанын айтады.