Вице-премьердің інісі Павлодар облысының полиция басшысы болып тағайындалды

Василий Скляр Нұрлан Мәсімовтың орнына Павлодар облысының полиция департаментінің басшысы болып тағайындалды.

«Ол (Скляр) командаға таныстырылды» деді жағдаймен таныс дереккөз.

Бұған дейін Екібастұз полициясын басқарған Василий Скляр Қазақстан премьер-министрінің бірінші орынбасары Роман Склярдың інісі екені белгілі.

Еске сала кетейік, бұған дейін Павлодар облыстық полиция департаментін ҚР Ұлттық қауіпсіздік комитетінің бұрынғы төрағасы Кәрім Мәсімовтің немере інісі Нұрлан Мәсімов басқарған болатын. 17 қаңтар күні Нұрлан Мәсімов полиция департаменті басшысы қызметінен босатылды.

Қазіргі уақытта ҚР ҰҚК экс-басшысы Кәрім Мәсімов қамауға алынған. Оған қатысты сатқындық фактісі бойынша қылмыстық іс тергелуде.

Ұлттық қауіпсіздік комитеті билікті күшпен басып алуға және лауазымдық өкілеттігін асыра пайдалануға бағытталған іс-әрекеттер фактілері бойынша сотқа дейінгі тергеу басталғанын хабарлады.

Аталған қылмыстарды жасады деген күдікпен бұрынғы орынбасарлары – «Арыстан» арнайы мақсаттағы қызметінің бастығы Әнуар Садықұлов пен Дәулет Ерғожин да ұсталды.