Венеция, Токио, Страсбург және Лион жаңа жыл қарсаңында алкоголь ішуге тыйым салды

Қалаларда отшашуларды сату шектеліп, адам көп жиналатын орындарды жауып тастады, деп хабарлайды Orda.kz Euronews сайтына сілтеме жасап.

Сондай-ақ бірқатар қалаларда адамдардың көп жиналуына, көзден жас ағызатын баллондар алып жүруге және отшашу атуға тыйым салынды. Барлық жағдайда билік бұл шешімді заңдылық пен қауіпсіздікті қамтамасыз ету қажеттілігімен түсіндіреді.

Венеция билігі жаңа жыл қарсаңында алкоголь ішуге тыйым салды. Қауіпсіздік мақсатында оларды дүкендер мен барларда сатуды, сондай-ақ қоғамдық орындарда ішімдік ішуді шектеуге шешім қабылдаған басқа қалаларға қосылды. Венецияда қоғамдық орындарда жаңа жыл қарсаңында алкогольді және алкогольсіз шыны ыдыстар мен пластик бөтелкелердегі сусындарды әкелуге және тұтынуға тыйым салынады. Шектеу 31 желтоқсан сағат 19.00-ден 1 қаңтар күні таңғы 6-ға дейін қолданылады. Тыйым барлар мен мейрамханаларға, тіпті ашық террассалары барларға да қатысты.

Тәртіп бұзғандарға 25-тен 500 еуроға дейін айыппұл салынады.

Венеция мэрі Луиджи Бругнаро ережелердің қатаңдатылуын қауіпсіздік мәселесімен және қоғамдық тәртіпті қамтамасыз ету қажеттілігімен түсіндірді.

Токионың түнгі өмірінің ең танымал екі ауданы Сибуя мен Синдзюку хэллоуин мерекесінде топтасып жиналу мен қоғамдық орындарда ішімдік ішуге шектеу қойды. Енді Сибуя билігі қоғамдық орындарда алкогольдік ішімдіктерді ішуге тыйым салуды алдағы жыл бойына, соның ішінде мереке күндерінде – 31 желтоқсан кешкі сағат 18.00-ден 1 қаңтардағы таңғы 5-ке дейін ұзарту туралы шешім қабылдады.

Тыйым танымал жиналатын орындардағы шуды шектеуге бағытталған. Аудан билігі жаңа жылдық кештердің тоқтатылатынын хабарлады.

Сибуя (Scramble Crossing) өткеліндегі таңғажайып кері санақ 2020 жылдан бастап тоқтатылды, өйткені жиналғандар (2018 жылы мұнда 120 000 қатысушы саналған) қауіпсіздік мәселесін тудыруы мүмкін. Жаңа жылға дейін дүкендерде алкогольді ішімдіктерді сату да уақытша тоқтатылады.

Францияның Страсбург қаласы 31 желтоқсан күні түстен жаңа жыл күні түске дейін көшеде алкоголь ішуге және сатуға тыйым салды.

Сондай-ақ 31 желтоқсанда сағат 22.00-ден 1 қаңтарда таңғы сағат 6-ға дейін «ата-анасының немесе отбасы мүшелерінің» ертіп жүруінсіз 16 жасқа толмағандарға коменданттық сағат енгізілді.

Лион қалалық әкімшілігі де 31 желтоқсан күні кешкі сағат 17.00-ден 1 қаңтардың 11.00-ге дейін қоғамдық орындарда алкогольді ішімдіктерді тұтынуды шектеді.

31 желтоқсанда кешкі сағат 20.00-ден жаңа жыл күні таңғы 9.00-ге дейін алкогольді ішімдіктерді сатуға тыйым салынды.

30 желтоқсанда таңғы 6-дан 3 қаңтарда таңғы 6-ға дейін отшашуларды сатуға, сатып алуға, сақтауға және тасымалдауға тыйым салынады.

Бұған дейін хабарлағанымыздай, жаңа жылды тойлау кезінде Алматы полицейлері де кезекшілікті күшейтеді.