Вакцина салдырып, ақшалай сыйлық ұтып алыңыз!

Атырауда азаматтарды коронавирустық инфекцияға қарсы вакцина алуға ынталандыру мақсатында ұтыс жарияланды. Жүлде қоры 40 миллион теңге!

Атырау облыстық Азаматтық Альянсының бастамасымен жүзеге асырылғалы отырған шараға облыс әкімдігі қолдау көрсетеді.

- 30 маусымнан бастап, І немесе II компонент вакцинасын алған тұрғындар арасында әр 10 күн сайын 200 мың теңге көлемінде 10 ақшалай сертификат ойнатылады. Жеңімпаздарды кездейсоқ сандарды генерациялаудың арнайы бағдарламасы анықтайды. Сондай-ақ, тамыз айының басында биылғы 30 маусымынан бастап 31 шілдесіне дейін вакцина алған адамдар арасында 3 млн. теңге көлемінде 2 сертификат ойнатылады.

Қыркүйек айының басында ағымдағы жылдың 1 тамызынан бастап 31 тамызына дейін вакцина алған тұлғалар арасында 3 млн. теңге соммасына тағы 2 сертификат ойнатылады. 10 млн. теңге сомасындағы бас жүлде қазан айында ойнатылады. Оған Атырау облысында 2021 жылғы 1 ақпаннан 30 қыркүйекке дейінгі кезеңде вакцинаның I немесе II компонентін алған адамдар қатыса алады, - дейді Атырау облыстық Азаматтық Альянсының президенті Әлібек Семғалиев.

Айта кету керек, ақшалай сертификат жеңімпаздарын тікелей эфирде және әлеуметтік желілерде, «Атырау облысының Азаматтық Альянсы» арнайы парақшаларында анықтайды. Жобаны іске асыру үшін белгілі блогерлер, белсенділер, азаматтық сектор өкілдері тартылатын болады.

Авторы: Эльмира Тунгатарова