Вакцина салдырған дәрігердің қызуы көтеріліп, қалтырай бастады

Қызуы көтеріліп жатып қалған. Алматылық эпидемиолог коронавирусқа қарсы вакцинаның ағзасына қалай әсер еткенін айтты, деп хабарлайды КТК телеарнасы.

Вакциналаудың бірінші аптасында Алматыда 61 дәрігер екпе ала алмады. Тексеру кезінде 59 дәрігерден қарсы көрсеткіштер анықталды. Тағы екі адам вакциналаудан өз еркімен бас тартты. Бірақ, емханалар мен ауруханалар қызметкерлерінің көпшілігі екпенің алғашқы дозасын алды. Бүгінде олардың саны – 1315.

Эльвира Ибрагимова, Алматы қалалық қоғамдық денсаулық басқармасының эпидемиологы:

«Кез келген екпеге адам ағзасы реакция береді. Бұл қалыпты құбылыс. Коронавирусқа қарсы вакцинаны мен де алдым. Сол күні қызуым көтеріліп қалтырай бастадым. Ол бір күнге созылды. Келесі күні денсаулығым қалпына келді».

Вакцинаның жанама әсерлері тіркелген жоқ, дейді қалалық қоғамдық денсаулық сақтау басқармасы. Тек кейбір науқастарда екпеге реакция болды - бұл дене қызуының көтерілуі, қалтырау және әлсіздік. Бұндай белгілер бір тәулік мөлшерінде байқалады. Енді дәрігерлер ревакцинацияға дайындалуда. 21 ақпаннан бастап «Спутник V» екінші дозасын егу басталады. Келесі аптада ампулалардың қажетті санын әкелуге уәде берілді. Вакцинаның алғашқы партиясы 1750 дозаға есептелген. Наурыз айының соңына дейін қалаға тағы 150 мың доза жеткізу жоспарланған.