Вакцина алу үшін барлық адамдар өз емханаларына жүгіне алады

Коронавирусқа қарсы вакцина алғысы келетіндердің барлығы өз емханасына жүгінулері қажет. Екпе кезек тәртібінде салынады.

— Егер сіз КВИ вакцинасын алғыңыз келсе, телефон арқылы учаскелік дәрігерге хабарлауыңыз керек. Емхана сізді тізімге енгізіп, кезек тәртібінде екпе алуға шақырады, – деп хабарлады ҚР ДСМ санитарлық - эпидемиологиялық бақылау комитетінің ресми өкілі Ержан Байтанаев Facebook-тегі жарияланымға берген түсініктемесінде.

Ержан Байтанаевтың мәліметінше, 700-ден астам емхана коронавирустық инфекцияға қарсы вакцинациялауға дайын.

— Қазіргі уақытта келіп түскен вакцинаның салыстырмалы түрде аз көлеміне байланысты 347 екпе кабинеті іске қосылды, – деп қосты ол.

Қазақстанда Covid-19 вакцинациясы 1 ақпанда басталды. Алғашқы вакциналаудан дәрігерлер, содан кейін мұғалімдер мен полиция қызметкерлері өтті. Сәуір айынан бастап халықтың осал топтарын вакциналауды бастау жоспарлануда.

ҚР Денсаулық сақтау министрі Алексей Цойдың мәліметінше, қазірдің өзінде 76 188 азаматқа екпе егілді. Сәуір айынан бастап жеткізілім көлемінің едәуір артуымен 180 мың доза вакцина жеткізіледі.

Премьер-министр Асқар Мамин әкімдіктер мен денсаулық сақтау министрлігіне вакциналанатындардың санын арттыруды қамтамасыз ету, вакцинаны сақтау және тасымалдау үшін қажетті жағдайлары бар егу кабинеттерін қосымша дайындау қажеттігін атап өтті.