Вакцинаға қарсы әйелдер дәрігерлерге жұмыртқа лақтырды

Оқиға Қызылорда облысы Шиелі ауданы Жуантөбе ауылында болған. Жергілікті блогер Facebook желісінде жариялаған видеода әйелдердің жиналыс соңында тұрып, мінбедегі адамдарға жұмыртқа лақтырып жатқанын көруге болады.

Ересек әйелдің мұндай әрекеті облыс тұрғындарының ашу-ызасын туғызды. Олар оған қатысты шара қолдануды сұрайды.

– COVID-19 және коронавирустық инфекцияға қарсы екпе ойлап тапқан дәрігерлер емес. Олар ауылдар мен аудандарға қызметтік міндеттеріне байланысты барады. Сондықтан оларға мұндай әрекет жасау әділетсіздік деп санаймыз, - дейді қызылордалықтар.

Шиелі ауданының әкімдігі жергілікті тұрғынның заңсыз әрекеті фактісін растады. Бірақ оған қарсы шара қолдану олардың құзыретіне жатпайды.

– Ақпараттық-түсіндіру тобы келген кезде бірқатар азаматтар жүргізіліп жатқан екпеге наразылықтарын білдірді. Ал жиналысқа қатысушылардың бірі қоғамға жат әрекет жасап, дәрігерлерге жұмыртқа лақтырды. Оған құқықтық баға берілді, әрекет ету құзырлы органдардың қолында, - деп жауап берді Шиелі ауданы әкімдігі.

Құқық қорғау органдары тәртіп бұзушыға қатысты материалдар жинақталып, сотқа жіберілгенін айтады.

– Қызылорда облысы Шиелі ауданы Жуантөбе ауыл округіндегі Мәдениет үйінде болған оқиға бойынша құқық бұзушыға ҚР Кодексінің 434-бабына сәйкес хаттама толтырылды. Әкімшілік құқықбұзушылық ("Ұсақ бұзақылық"), - деп жазылған Қызылорда облыстық полиция басқармасының баспасөз хабарламасында.