Вагнер тобының шекараға жақындағанына Польша алаңдаулы

Польша премьер-министрі «Вагнер» тобының 100-ден астам жауынгері Польша мен Литва шекарасы өтетін Сувалск дәлізіне шыққанын мәлімдеді.

29 шілдеде Польшаның Жоғарғы Силезия провинциясындағы қару-жарақ зауытына барған кезде Польша премьер-министрі Матеуш Моравецкий «Вагнер» компаниясының жүзден астам адамы Беларусь шекарасына көшкенін мәлімдеді, деп жазады Meдуза. Оның айтуынша, олар қазір Польша мен Литва шекарасындағы Сувалск дәлізіне қарай жылжуда.

«Мүмкін, олар Беларусь шекарашыларының атын жамылып, елдегі тұрақтылықты бұзу үшін заңсыз мигранттарға Польшаға кіруге көмектесетін шығар. Сондай-ақ олар Польшаға заңсыз мигранттардың атын жамылып кіруге әрекеттенуі де ықтимал, бұл елге қауіп төндіреді», - деді Польша премьер-министрі.

Моравецкий жауынгерлердің Беларусь аумағы арқылы қозғалысын «Польша территориясындағы алапат шабуылдың жалғасы» деп санайды. Айта кету керек, өткен аптада Беларусь президенті Путинге Вагнер әскерлерінің жүрісі өзін алаңдататынын айтып, олар Польшаға «серуендеуге» бармақшы деп шағымданды.

Вагнер тобына қарсы тұру үшін Польшада екі отряд құрылып жатқаны бұрын хабарланған болатын. Польша Қорғаныс министрі Мариуш Блашчак: «Сувалск» дәлізіне жақын жерде поляк әскери-инженерлік батальоны орналастырылады. Одан  басқа да бөлімшелер «Минсктен төнген қауіпке» қарсы қорғанысты күшейту үшін құрылуда. Осының алғашқысы сапер батальоны болды.