«Ұзаққа созылған сот ісі»: 15 сағаттық азапты өлім

Соңғы 10 жылда тұрмыстағы зорлық-зомбылық күрт өсті. Соның ішінде әйел өлтіру фактілері көп. Марқұм Салтанат Нүкенованың өлімі қоғамда резонанс тудырып, 50 мың адам қол жинап осы мәселеге қатысты заң қабылданған болатын. Сол «Салтанат заңы» шыққаннан кейін осындай қылмысқа қатысты қабылданып отырған сот шешімінің бірін бақылап, Orda.kz тілшілері жәбірленуші тарапқа хабарласты. 

Өткен жылдың желтоқсан айында Семейде бүкіл қаланы дүр сілкіндірген қайғылы оқиға болды. 33 жастағы Диананы жігіті көлігімен қасақана қағып өлтірді. 

Диананың ұлы анасыз қалды. Қайтыс болған әйелдің анасы «ол менің қызымды өлтіргенде мені де қоса өлтірді» деп отыр.

7 ай бойы Диананың анасы қызының өліміне айыптыны соттау ісімен күресті. Белгілі себептермен кейінге қалдырылып келе жатқан сот шешімі енді шықты. Семей қалалық сотының судьясы Л.Фидосова төрелік еткен сотта айыпкерге 9 жыл 6 айға бас бостандығынан айыру туралы үкім шығарылды.

«15 сағатқа созылған азапты өлім»

Жақындарының сөзінше, істің бір жылға созылғаны, сондай-ақ 106 бап — «денсаулыққа қасақана зиян келтіру» айыбымен ғана сотталғалы отырғаны, оның адвокаттарының мұны жол апаты сияқты баяндауы істі тым шиеленістіріп жіберді. Ақыры, прокурор сұраған 10 жылға бас бостандығынан айыру туралы жазаны судья қабылдады. Марқұм Диананың анасы айыптыға қанша жыл берсе де аз деп отыр.

 «Мен үшін қанша уақытқа бас бостандығынан айырса да аз болады. Тым болмаса осы тағайындаған жазаны сол күйі қолданса екен. Олар қайта аппеляцияға береді», — деді анасы алаңдап. 

Марқұмның ауруханаға жеткен кезіндегі бейнежазбаны «НеМолчи.kz» қоры жариялаған болатын. Диана 15 сағат бойы жан сақтау бөлімінде қиналып қаза болды. Марқұмның анасы қызының ауруханада жатқаны жайлы хабар бермегенін айтты. Бейнежазбадағы қиналып жатқан Диананы қараған дәрігерлердің «салқынқандылығы» жұртты біраз шошытқан болатын.

Айыпты қасақана түрде көлікті оған қарай бар жылдамдықпен жүргізіп келе жатады да, кілт тоқтай қалады. Сосын, 1 метрдей жерде тұрған Диананы аямастан қағып өтеді. Бейнежазба сапасыз болса да, Диананың көлік «капотына» бір-ақ шыққаны, жүргізушінің тоқтамай жүре бергені байқалады.
Көз жұмбас бұрын Диана 15 сағат бойы жансақтау бөлімінде азап шекті. 

«Айыпкер марқұмның ұлын қамап қойған» 

Диана 14 желтоқсан күні кешкісін анасымен сөйлесті. Әңгіме барысында марқұм осы айыпкер азамат Галушкин Александрға тұрмысқа шығып, «отбасы құрғысы келетінін» айтыпты. 

Анасының сөзінше, айыпты еркек қылмыс болған түні Диананың кішкентай ұлын үйге қамап кеткен. Ол үйде анасының қайтып келуін күтіп отыра беріпті. Диананың анасы өзінің жиен немересінің бейхабар күйде өлім аузындағы анасын күтіп отырғанын мүлде білмегенін айтты. Диананың торт ұстап, көңілді жүрген бейнежазбасын бұған дейін «НеМолчи.kz» жариялаған болатын.

«Марқұмды соққыға жығып келген»

«Тас түскен жеріне ауыр»

Сот-медициналық сараптамада ми жарақаты мен бас сүйегінің сынуынан қайтыс болды делінген. Сондай-ақ, Диананың бұған дейін де соққыға жығылғаны белгілі болды. Анасыз қалған немересінің жағдайына алаңдап, қызынан айырылған ана айыпты аппеляциялық сотқа арыз беретінін айтты. 

«Біз 99 баппен айыптап, оған қатаң жаза қолданғанын қаладық. Бірақ 106 баппен айыптады. Алдағы уақытта олар осы үкімге қатысты аппеляциялық шағым түсіреді. Сот әділ болып, бұл арызды қабылдамайды деп үміттенемін», — деді марқұмның анасы.

Қазақстанда соңғы кездері зорлық-зомбылыққа қатысты, соның ішінде әйелдерге қатысты қылмыстық істер көбейіп кетті. Статистикалық деректерді назарларыңызға ұсынамыз.

Қорыта келе айтарымыз, бұл жиілеп кеткен қылмыстар бізге тұрмыстық зорлық-зомбылықпен күресудің маңызын көрсетеді. Жай ғана қол көтерудің өзі, тіпті жай тұрмыстағы жан-жалдың өзі қылмысқа ұласуы мүмкін. Құрбандарды қорғау үшін,  кінәлілерді жазалау үшін әділ шешім қабылдануы керек. Қандай жағдай болмасын сот төрелігі әділ болып, барлық азаматтардың қауіпсіздігін қамтамасыз етуі керек.