Ұялы телефон нөмірлерін тіркеу кезінде бет биометриясы қажет

Қазақстанда ұялы телефон нөмірін тіркеу кезінде бет-әлпет биометриясын қолдану енгізілмек, деп хабарлайды Алматы телеарнасы.

Тиісті бұйрық жобасы Ашық НҚА порталында қоғамдық талқылауға шығарылды.

Цифрлық даму министрлігі Телекоммуникациялар комитетінің басқарма басшысы Олжас Қабеновтың айтуынша, бұл түзетуге осы ведомство бастамашы болып отыр.

«Бұл норма абонентті анықтау және осы абоненттің жеке басын растау мақсатында енгізілген. Өздеріңіз білесіздер, қазір интернетке және телефонға мобильді қолжетімділік әрбір азаматтың ажырамас бөлігі болып кеткен. Қазір цифрлық сертификат сертификаттың қағаз нұсқасына теңестірілгенін білесіздер. Сондықтан алаяқтық әрекеттерге жол бермеу үшін абоненттік құрылғыларды тіркеудің биометриясын енгізгіміз келеді», - деді Олжас Қабенов.

Биометрика сіздің жеке басыңызды растау үшін пайдаланылады. Желілерде тіркелген әрбір абонент сәйкестендіріліп, әрекет ету сәтінен бастап биометрика арқылы расталмаған барлық абоненттік нөмірлер тіркелмейді. Жаңадан тіркелген абоненттер үшін биометрика енгізіледі.

«Қолданыстағы абоненттер үшін бұл ереже қолданылмайды, бірақ олар басқа операторға өтсе, қайта тіркеледі. Өту кезінде олар өздерінің жеке басын биометрика арқылы немесе ұялы байланыс операторымен келісім-шартты бұзған кезде, тек осы жағдайларда ғана растайды. Егер сіз бұрынғы оператор қызметінде қалатын болсаңыз, онда сізден жеке басын куәландыратын биометриялық тексеруден өту талап етілмейді», - деп қосты басқарма басшысы.