Ұшақта шу шығарған шетелдіктер рейстен шығарылды

Литваның екі азаматшасы Алматы-Астана рейсінде жолаушыларды сыйламады.

Көліктегі полиция департаментінің мәліметінше, 54 және 57 жастағы литвалық екі әйел рейс кезінде өздерін дөрекі ұстап, Алматы-Астана рейсінің басқа жолаушыларын көзге ілмей, шу шығарған.

Ұсақ бұзақылық жасаған әйелдерге қатысты әкімшілік хаттама толтырылып, материал қаралу үшін сотқа жолданды. Оларға 20 АЕК көлемінде айыппұл салынады немесе 5-тен 15 тәулікке дейін әкімшілік қамауға алынады.

Сол күні тағы бір құқық бұзушылық орын алды. Алматы әуежайындағы желілік полиция бөлімінің қызметкерлері Алматыдан Кутаисиге ұшатын екі жолаушыны рейстен шығарды.

«Тексеру барысында көлік полициясы рейске отыру кезінде ұшақтың жанында темекі шегіп тұрған 20 жасар Германия азаматшаларын анықтады. Құқық бұзушылардың әрқайсысына 15 АЕК (55 380 теңге) көлемінде айыппұл салынды» деп хабарлады Көліктегі жол полициясы басқармасының баспасөз қызметі.