Ұшақ ғимаратқа соғылды

Калифорнияның Фуллертон қаласында төрт адамға арналған шағын ұшақ ғимарат шатырына соғылып, өрт шықты, деп хабарлайды Orda.kz.

Қайғылы оқиғадан екі адам қаза тапты, 18 адам жарақат алды, оның ішінде 10 адам ауруханаға жеткізілді.

LA Times хабарлағандай, ұшақ апаты 2 қаңтарда, жергілікті уақытпен сағат 14:00-де болды. Associated Press деректеріне сүйенсек, Van's Aircraft RV-10 маркалы бірмоторлы ұшақ ұшқаннан кейін бір минут ішінде апатқа ұшыраған. Бұл оқиға муниципалдық Фуллертон әуежайының жанында, Диснейлендтен шамамен 10 шықырым қашықтықта болды.

Алғашқы деректер бойынша 11 адам жарақат алды деп хабарланғанымен, кейіннен Фуллертон полициясының өкілі Кристи Уэллс зардап шеккендер санының 15-ке жеткенін хабарлады. Олардың тоғызы ауруханаға жатқызылды, ал қалған алтауы оқиға орнында медициналық көмек алды. Полицияның соңғы мәліметі бойынша, 18 адам зардап шекті, оның ішінде 10 адам ауруханаға жеткізілді.

Оқиға орнында түсірілген бейнекөріністерден ғимараттың шатырындағы үлкен тесіктен қара түтіннің көкке көтеріліп жатқанын көруге болады. Бұл аймақтағы тұрғындар дереу эвакуацияланды.

Ұшақтың не себепті апатқа ұшырағаны әлі белгісіз. Федералдық авиациялық басқарма (FAA) оқиғаны тергеп-тексеру жұмыстарын бастады. FlightAware ұшу деректерін бақылау қызметі бұл ұшақтың апатқа ұшырағанға дейін әуеде небәрі бір минут болғанын растады.

Фуллертон әуежайы – жалпы авиацияға арналған аймақтық әуежай, ол бір ғана ұшу-қону жолағымен және тікұшақ алаңымен жабдықталған. Оның жанында Метролинк аймақтық теміржол желісі орналасқан, ал көршілес аумақта тұрғын үйлер мен коммерциялық қоймалар бар.