Ұрып-соғып, ақша талап еткен күдіктілер ұсталды

Ақтөбе облысында жарты миллион теңге бопсалаған күдіктілер ұсталды.

Бұл туралы Ішкі істер министрлігі хабарлады.

Ақтөбе тұрғыны полиция бөлімшесіне бопсалау дерегі бойынша арызданды. Тергеп-тексеру барысында аудандардың бірінде жәбірленушінің көлігі бұзылған, оған белгісіз адамдар келіп қорқытып, ұрып-соғу арқылы ақша талап еткені анықталды. 

«Күдіктілер автокөліктен 13 арнайы киімнің жиынтығын алып, оларды қайтару үшін 500 мың теңге талап еткен. Арнайы бөлімше жауынгерлерінің қатысуымен жедел іс-шараларды өткізу барысында Ақтөбе облысы ПД Ұйымдасқан қылмысқа қарсы күрес басқармасының қызметкерлері Хромтау қаласының бес тұрғынын анықтап, ұстады», - деп мәлімдеді ІІМ баспасөз қызметі. 

Заттай айғақтар тәркіленді. Бопсалау фактісі бойынша сотқа дейінгі тергеп-тексеру жүргізілуде. Күдіктілердің бірі уақытша ұстау изоляторына қамалды.