Ұлытаудағы мектепте бір құты бояуға екі миллион жұмсамақ болған

Сыбайлас жемқорлыққа қарсы қызмет Ұлытау облысындағы мектептердің бірінің мамандары екі миллионға жуық теңгеге бір құты бояу сатып алмақ болғанын анықтады.

Хабар 24 арнасының ақпаратына сәйкес, іске Антикор араласқан соң 18 құты бояудың бағасы 47 мың теңгеге түсірілген.

Жыл басынан бері Антикор қызметкерлері Қаражал қаласы әкімдігі тарапынан да заңбұзушылықты анықтаған. Әкімдік қызметкерлері 65 360 000 теңгеге үш қызметтік автокөлік алмақ болған, түптеп келгенде бір көліктің құны 11 290 000 теңге екені белгілі болды.

«Ағымдағы жылдың бірінші тоқсанындағы жұмыс қорытындысы бойынша 34 миллион теңгеге жуық бюджет қаражатының тиімсіз пайдаланылуына жол берілмеді. Жалпы, сыбайлас жемқорлыққа қарсы қызмет заң бұзушылықтарды анықтау бойынша жұмысты жалғастырып жатыр, ол бойынша ақпаратқа мониторинг жүргізілді. «Сатып алудың бірыңғай терезесі» ақпараттық жүйесінің жұмысы тұрақты негізде жүргізіліп жатыр. Агенттікке осы платформаларды жетілдіру бойынша ұсыныстар енгізілді», - деді облыстың сыбайлас жемқорлыққа қарсы қызмет департаментінің ерекше маңызды істер жөніндегі қызметкері Гүлнұр Сүлейменова.