Ұлытаудың мәдениет басқармасының сотталған басшысына тағы мерзім қосып берді

Жезқазған қалалық соты Ұлытау облысының мәдениет, тілдерді дамыту және архивтер басқармасының басшысы Әнуар Омарға қатысты үкім шығарды. 

Бұл туралы Сыбайлас жемқорлыққа қарсы іс-қимыл агенттігі хабарлады.

Әнуар Омар мемлекеттік бюджеттен 2,3 миллион теңге көлеміндегі қаражатты заңсыз иеленгені үшін кінәлі деп танылды. Бұл қаражат мұражайтанушылар мен басқа ғалымдардың мақалалар жинақтарын басып шығару бойынша орындалмаған жұмыстар үшін төленген.

Бұл қызметті Әнуар Омар 2022 жылдан бері атқарып келеді.

Әнуар Омар бұған дейін Жезқазған қалалық сотының 2024 жылдың 12 наурызындағы үкімімен 6 жыл бас бостандығынан айырылған болатын. Осыған байланысты, Қазақстан Республикасы Қылмыстық кодексінің 58-бабының 3-ші және 6-шы бөлімдері негізінде оның жазасы жинақталған қылмыстық құқық бұзушылықтар бойынша ішінара қосылып, 6 жыл 6 ай бас бостандығынан айыру жазасы және мәңгілік мемлекеттік қызметте лауазым атқару құқығынан айыру үкімі шығарылды.

Үкім заңды күшіне енді.