Ұлытауда суға кеткен 10 үйге кінәлілер сотталғалы жатыр

Қаржылық мониторинг агенттігі Ұлытау облысының табиғи ресурстар басқармасы басшысына және Жезді өзенін «Санациялау» жобасы бойынша жұмысты тиісті деңгейде атқармаған мердігерлерге қатысты қызмет бабын асыра пайдалану ісі бойынша тергеуді аяқтады. Ұлытау облысының табиғи ресурстар басшысы мен мердігердің үстінен іс қозғалды, деп хабарлайды Orda.kz.

 Тергеу барысында құрылыс нормаларының өрескел бұзылғаны және жобалық құжаттамада ауытқулар болғаны анықталды. Бұл жағдай жобада көрсетілген су өткізу қабілетінің төмендеуіне әкелді.

Тергеу деректеріне сәйкес, табиғи ресурстар басқармасының басшысы іс жүзінде орындалмаған жұмыс актілеріне қол қойған. Техникалық және авторлық қадағалау өкілдері де нысанға бармастан, орындалған жұмыс актілеріне қол қойып отырған.

Бұл лауазымды тұлғалардың әрекеттері биыл көктемде су тасқыны кезінде Жезді ауылындағы 10 жеке үйдің су астында қалуына себеп болды. Апат кезінде шұғыл түрде 108 адам, оның ішінде 56 бала эвакуацияланды.

Тергеу материалдары сотқа жолданды.