Ұлытау облысында экология департаментінің басшысы сотталды

Ұлытау облысында экология департаментінің басшысы Дастан Тілеубеков пара алғаны үшін сотталды, деп хабарлайды Orda.kz. 

Жезқазған соты Дастан Тілеубековке, оның орынбасарына және екі кәсіпкерге сыбайлас жемқорлық туралы іс бойынша үкім шығарды. Тергеу қорытындысы бойынша, өткен күзде экология департаментінің басшысы Дастан Тілеубеков пен оның орынбасарына жалпы 5 250 000 теңге пара берілген.

Дастан Тілеубеков жер қойнауын пайдаланушыға жұмыс істеуге рұқсат бергені үшін «BASS Gold» компаниясынан 2,5 миллион теңге көлемінде тағы пара алған. Шенеуніктер мен кәсіпкерлер кінәсін толығымен мойындады.

Тілеубеков пен оның орынбасары алты жылға бас бостандығынан айырылды. Ал екі компанияның басшылары айыппұлмен құтылды. 

Дастан Тілеубеков өңірлік департаментті 2022 жылдың қыркүйегінен бастап басқарған. Ол Қарағандының тумасы, сол жерде жоғары білім алған. Мансабын эколог болып бастаған. Қоршаған ортаны қорғау саласындағы мемлекеттік жүйеге 2003 жылы келді. Ұлытау облысына келгенге дейін экология министрлігі жанындағы экологиялық сараптама және рұқсат беру басқармасының басшысы болып жұмыс істеді.