Ұлытау облысында ауыл шаруашылығы басқармасының экс-басшысы Антикор назарына ілікті

Ұлытау облысында шенеунік заңсыз сыйақы алғаны үшін күдікке ілінді, деп хабарлайды Orda.kz.

Тергеу барысында Ұлытау облысының ауыл шаруашылығы және жер қатынастары басқармасының бұрынғы басшысы Қайрат Мұтаевтың сыйақыларды заңсыз алғаны белгілі болды. Алдын ала мәлімет бойынша, ол жеті жарым миллион теңгені қалтасына басқан.

Сыбайлас жемқорлыққа қарсы қызмет қылмыстық істі тіркеді. Мұтаевпен бірге оның орынбасары Ақбаян Сексенбаева да тергеліп жатыр. 

Orda.kz Ұлытау облысы әкімдігімен хабарласып, байланысқа шықты. Әкімдіктегілер тергеуге алынған шенеунік енді жұмыс істемейтінін айтты.

Қайрат Мұтаев аграрлық секторда негізгі лауазымдарды атқарған. Ауыл шаруашылығы министрлігінде жұмыс істеген және мал шаруашылығы өнімдерін қайта өңдеу мәселелеріне жетекшілік еткен. 2022 жылдың шілдесінде ол Ұлытау облысының ауыл шаруашылығы басқармасының басшысы болып тағайындалды.