Ұлытау облысында асырап алған балаларды «құл» орнына ұстаған

Бала құқықтары жөніндегі уәкіл Динара Зәкиева балаларға жауапты  отбасы кәмелетке толмаған, асырап алған үш баланы шаруашылықта жұмыс істеуге мәжбүрлегенін айтты, деп хабарлайды Orda.kz.

Оқиға  Ұлытау өңірінде болған. Зәкиеваның айтуынша, балалар фермада бес жыл бойы мал баққан. 

«Ақпан айының басында облыстық прокуратураның мен қорғаншылық мобильді топтарының тексеру нәтижесінде 2018 жылы патронаттық отбасы балалар үйінен алған бір отбасынан үш бала - бір қыз және екі ұл анықталды. Отбасы балаларды алғанда олардың жастары 14, 12 және сегізде болды. Үлкендерін қаладан 20 шақырым жердегі өздерінің шаруашылықтарында ұстап, мал бағуға мәжбүр еткен. Шаруашылықта екі табын жылқы мен 18 сиыр бар»,   дейді Зәкиева.

Әйел балалардың тұрмыс жағдайын көріп, шошығанын жазады.

«Қамқоршы балаларды қорлады, ұрды, азаптады, бір сөзбен айтқанда -  құлдықта ұстады»,  деп мәлімдеді ол.

Үлкен қыздың колледж бітіргеніне қарамастан, жұмысқа шықпағандығы айтылады. Ағаларынан ажырап қалу қаупімен ол да фермада жұмыс істеуге мәжбүр болған.

Ал ұлдар мектепке мүлде бармаған. Құзырлы органдар оқу орындарын тексергенде белгілі болғаны –  қамқоршылары олардың атынан үнемі «ауырып жатқандары» туралы анықтама өткізіп отырған. 

Зәкиеваның айтуынша, бұл қамқоршылар бұрын тағы да басқа балаларды асырап алуға дайын екендіктерін айтқан.

«Қазір қылмыстық іс қозғалып, тергеу жүріп жатыр. Балалар бөлінбейді және қауіпсіз. Оларға психологиялық көмек көрсетіледі»,  деді Зәкиева.

Оның айтуынша, балалар мәселесі қазір облыс әкімінің жеке бақылауында.