Ұлытау әкімі Тоқаевқа марқұм шахтерлердің отбасына көрсетілген жәрдем жайлы айтты

Қазақстан Президенті Қасым-Жомарт Тоқаев Ұлытау облысының әкімі Дастан Рысбековпен кездесіп, өңірдің экономикалық дамуы мен кеншілер отбасыларына көрсетіліп жатқан қолдау шараларын талқылады. Сонымен қатар, президентке марқұм шахтерлердің отбасына көрсетілген жәрдем жайлы айтты, деп хабарлайды Orda.kz.

2024 жылдың қорытындысы бойынша облыста өнеркәсіп өндірісі 8%-ға артты, құрылыс жұмыстарының көлемі 28%-ға, тұрғын үй құрылысы 30%-ға ұлғайды. Өңірге 226 миллиард теңгеден астам инвестиция тартылды, оның 89%-ы жеке қаражат. Сондай-ақ 940 миллиард теңгенің инвестициялық қоры құрылып, 2025 жылы 138 миллиард теңгені құрайтын 17 жоба іске қосылмақ.

Кездесу барысында өндірістік қауіпсіздік мәселелері де көтерілді. Дастан Рысбеков «Қазақмыс» корпорациясының кенішінде болған қайғылы оқиғада қаза тапқан кеншілердің отбасыларына көрсетіліп жатқан көмек туралы баяндады.

«Дастан Рыспеков «Қазақмыс» корпорациясының кенішінде таяуда болған апат салдарынан қаза тапқан шахтерлердің отбасыларына қандай көмек көрсетіліп жатқанын айтты»,  деп мәлімдеді Ақорданың баспасөз қызметі.

Мемлекет басшысы өңір басшысына бірқатар стратегиялық міндеттер жүктеді:

• көлік-логистика әлеуетін дамыту;
• инфрақұрылымды жаңғырту;
• медицина сапасын жақсарту;
• халықты сапалы ауызсумен қамтамасыз ету;
• экологиялық түйткілдерді шешу.

Алдағы жылдары Ұлытау қандай өзгерістерге ұшырайтыны осы бастамалардың қаншалықты тиімді жүзеге асатынына байланысты болмақ.