«Ұлымен қауыша алмады»: Дикий Арманның анасының өмірінің соңғы сәттері белгілі болды

Дикий Арман лақап атымен танымал Арман Жұмагелдиевтің анасы Роза Жұмагелдиева өмірінің соңғы сәтінде ұлымен кездесе алмай кетті, деп хабарлайды Orda.kz.

Арман Жұмагелдиевтің адвокаты Рена Кәрімова Orda.kz тілшісіне берген түсініктемесінде марқұм Роза Жұмагелдиеваның ұлымен кездесе алмағанын айтты.

Оның айтуынша, мекемеге кіруге рұқсат алу қиындық туғызған.

«Ұлымен кездесуге рұқсат алу оңай болған жоқ. Анасы Костанайда болды, бірақ кездесуге ресми рұқсат ала алмады. Соның салдарынан жүздесе алмады. Сол жақта көз жұмды», — деді Кәрімова.

Сондай-ақ ол алдын ала дерек бойынша Роза Жұмагелдиеваның өліміне микроинсульт себеп болуы мүмкін екенін нақтылады.

Еске салсақ, марқұмның өлімі жайлы алғашқы болып Арман Жұмагелдиевтің жақын досы Нұржан Иманәлиев хабарлады. Оның айтуынша, Роза Жұмагелдиева Костанайға ұлын көруге барған. Сапардан кейін оның жағдайы күрт нашарлап, ауруханаға жеткізілген. Сол жерде өмірден озған.