Ұлыбританияның ең бай адамдарының бірі жоғалып кетті

«Британдық Билл Гейтс» деген атпен танымал техномагнат Майк Линч Сицилия жағалауында мінген яхтасы апатқа ұшырап, жоғалып кетті.

Бұл туралы Bloomberg хабарлады.

Оның 56 метрлік Bayesian яхтасы 19 тамызда торнадоға тап болып, Палермо маңында батып кетті. Оқиға салдарынан бір адам қаза тапты. Ал 6 адам хабар-ошарсыз жоғалғандар қатарына қосылды. Іздеу жұмыстары жүргізіліп жатыр.

Яхтада 22 адам болған, оның ішінде Линч пен оның жұбайы Ангела Бакарес те бар. 15 адам құтқарылды. Ал қалғандарының тағдыры әлі белгісіз. Яхта 50 метр тереңге батып кеткендіктен, құтқарушылар су астында да, бетінде де жұмыс істеп жатыр.

Линч жақында АҚШ-та Autonomy компаниясын Hewlett-Packard-қа $11 млрд-қа сатуына қатысты сот ісіндегі жеңісін атап өткен болатын. Ол Ұлыбританияның екі премьер-министрінің кеңесшісі болып қызмет атқарған және Британдық Империя орденімен марапатталған.