Ұлыбританияда терроризм үшін сотталған исламист жергілікті сайлауға түспек

Шахид Батт Ұлыбританияның Бирмингем қалалық кеңесіне өтетін сайлауға тәуелсіз кандидат ретінде тіркелді. Ол бұрын британдық консулдықты, англикан шіркеуін және Йемендегі қонақ үйді жару жөніндегі қастандық үшін бес жылға сотталған, деп хабарлайды Orda.kz The Telegraph сайтына сілтеп. 

Шахид Батт 1999 жылы бес жылға бас бостандығынан айырылған. Йемен соты оны Финсбери-Парк мешітінен шыққан, өшпенділік уағыздаушысы ретінде танылған Абу Хамза тобының құрамында террористік әрекеттер жасау үшін Йеменге жіберілген деп таныды. Топ құрамында Хамзаның өз ұлы мен өгей ұлы да болған. 1998 жылдың желтоқсанында Йеменде батыс елдерінің туристері ұрланған. Бұл әрекеттің мақсаты — билікті Батт пен оның сыбайластарын босатуға мәжбүрлеу болған. Сол операция кезінде бірнеше кепілге алынған адам қаза тапты. Олардың ішінде үш британ азаматы да дабар.

Ал Хамзаның өзі 2015 жылдың қаңтарында Нью-Йорк соты тарапынан терроризм мен адам ұрлау бойынша 11 айып тағылып, өмір бойына бас бостандығынан айырылды.

Исламистік шабуылдардан зардап шеккендер терроризм үшін сотталған адамның сайлауға қатысуына жол берілгенін сынға алып, бұл саяси жүйені мазаққа айналдырады деп мәлімдеді.

Батт жуырдағы сұхбатында жастық шағында «қателіктер жібергенін» мойындағанымен, терроризм айыптаулары бойынша өз кінәсін жоққа шығарады.

Батт 2003 жылы түрмеден шыққаннан кейін өзін экстремизмге қарсы күресуші ретінде таныстырып, ішкі істер министрлігімен және дерадикализацияға арналған Prevent бағдарламасымен ынтымақтасқанын айтады.

Қазір 62 жастағы ер адам 7 мамырда өтетін сайлауда Бирмингем қалалық кеңесіндегі тәуелсіз кандидаттар альянсының атынан сайлауға түсіп отыр.

Айта кетейік, Трамп қатты аяз кезінде шабуылды тоқтату жөнінде Путинмен келісім болғанын мәлімдеді.