Ұлттық банк базалық мөлшерлемені 16 пайызға дейін көтерді

Қазақстанның Ұлттық банкі базалық мөлшерлемені 16 пайызға дейін көтерді.

«Қазақстан Республикасы Ұлттық Банкінің Ақша-несие саясаты комитеті базалық мөлшерлемені +/-1 п.п. пайыздық дәлізімен жылдық 16%-ға дейін көтеру туралы шешім қабылдады. Тиісінше, өтімділікті қамтамасыз етуге тұрақты қолжетімділік операциялары бойынша мөлшерлеме 17%, ал өтімділікті алуға тұрақты қолжетімділік операциялары бойынша 15% болады» деп хабарлады Ұлттық банктің баспасөз қызметі.

Реттеушінің айтуынша, шешім бұрынғы шешімдер мен коммуникациялармен белгіленген бағыт пен қарқынды сақтай отырып, мөлшерлеме траекториясын түзетеді.

«Мөлшерлемені көтеру инфляциялық қысымның өсуін көрсететін факторлардың жиынтығына байланысты. Қыркүйек айындағы жағдай бойынша инфляцияның болжамдардан асып түсуі айтарлықтай елеулі болды. Шешімнің негізгі факторлары жоғары инфляциялық күтулер, күшті сұраныс, фискалдық серпін, неғұрлым тұрақты жеткізу тізбегіне қайта бағдарлану есебінен өндіріс шығындарының өсуі, сыртқы инфляцияның трансферінің жалғасуы, оның ішінде Ресей рублінің тұрақты айырбас бағамының сақталуы нәтижесінде болды».

Ақпаратқа сәйкес, «инфляциялық күтудің артуы бағалар мен тұтынушылардың мінез-құлқына қысым жасайды».

«Мұның барлығы 2023 жылы инфляцияны бақылауда ұстау үшін қатаң ақша шарттарын талап етеді. Базалық мөлшерлеменің ұлғаюының әсері шаруашылық жүргізуші субъектілердің жинақтау белсенділігін қолдап, ішкі валюта нарығындағы тепе-теңдікті сақтауға ықпал ете отырып, бір жылдан екі жылға дейін арттырылады» деді Ұлттық банк.