Ұлттық ұланның 36 сарбазы ауруханаға түсті

Карағанды облысында ҚР Ұлттық ұланының 5516 әскери бөлімінің 36 сарбазы ауруханаға жеткізілді.

Бұл туралы ҚР Ұлттық ұланы «Орталық» өңірлік қолбасшылығының баспасөз қызметі хабарлады. 

18 тамыз күні Теміртау қаласындағы жұқпалы аурулар ауруханасына 36 әскери қызметкер жеткізілді. Олардың 31-іне алдын ала  жедел ішек инфекциясы диагнозы қойылып, ал бес сарбазда респираторлық вирус бар деген болжам бар. Эпидемияға қарсы ем шаралары жасалып жатыр.

Еске сала кетсек, бұл Қарағанды облысы тұрғындарының жаппай ішек инфекциясымен ауырған алғашқы жағдайы емес. Orda.kz бұған дейін 16 тамызда Балқаш қаласындағы «Досжан» отбасылық пансионатында демалушылар осылай ауырғанын жазған болатын.

Қазір бұл жағдайды Балқаш пен Қарағанды санитарлық дәрігерлері және облыстық полиция департаменті тексеріп жатыр.