Ұлттық ұлан курсанттары жаппай төбелес шығарды

Петропавлда Ұлттық ұлан курсанттары жаппай төбелес шығарды, деп хабарлайды Orda.kz.

Петропавлда Ұлттық ұлан академиясының курсанттары жаппай төбелесті. Оқиға туралы ақпарат әлеуметтік желіде тарап кетті.

Төбелеске 20 немесе 40 шақты азамат қатысты деген деректер бар. Соның ішінде осында оқитын Тәжікстан азаматтары бар.

Ұлттық ұлан академиясы төбелес болғанын растады:

«Петропавлдағы Ұлттық ұлан академиясында болған бірінші курс курсанттары арасындағы жанжал бойынша тергеу жүріп жатыр. Оқиға салдарынан бірнеше курсанттың денесі сырылып, кейбір жерлері іскен», деп мәлімдеді. 

Еске ала кетсек, Петропавлдағы академия 1997 жылы Қазақстан ішкі істер министрлігі ішкі әскерлерінің Жоғары әскери мектебі болып ашылған. 2022 жылы оқу орны Республикалық Ұлттық ұлан академиясы мәртебесін алды.

Академия тек Қазақстан азаматтарын ғана емес, басқа елдердің де азаматтарын оқытады. Осылайша, үкіметаралық келісімдер бойынша 2009 жылдың қыркүйек айынан бастап Тәжікстан азаматтары да жыл сайын әскери оқу орнының базасында білім алып жатыр.