Ұлттық орталық бірегей тарихи қолжазбаның көшірмесін ұсынды

Қолжазбалар мен сирек кітаптар ұлттық орталығы «Мұрағат 2025» жобасы аясында Ресей Ұлттық кітапханасынан табылған құнды тарихи қолжазбаның көшірмесін таныстырды, деп хабарлайды Orda.kz.

XVII ғасырға тиесілі бұл құжатты орталық мамандары 2022 жылы Мәскеуге жасаған ғылыми экспедициясы кезінде тауып, зерттеу жүргізген.

Парсы тілінде жазылған «Тарих» деп аталатын құнды олжада Қазақстан тарихына қатысты оқиғалар туралы маңызды мәліметтер бар. Бұл кітап Мұхаммед Хайдар Дулатидің әйгілі «Тарих-и Рашиди» еңбегінің жалғасы болып шықты және Қазақ хандығының құрылуы мен дамуын зерттеуде елеулі орын алады.

Қазақ хандығы туралы бірегей деректер қолжазбаны ерекше құнды ете түспек. Қолжазбаның авторы Шах Махмуд ибн Мырза Фазыл Чурас көрнекті тарихшы және шежіре білгірі болған. Моғолстанды зерттеуге көп уақытын арнап, 30 жыл бойы өз еңбектерімен айналысты.