Ұлттық қордан 840 млн теңге ұрлады деп айыпталған кәсіпкер жайлы не білеміз?

Петропавл соты Green Smart Farm компаниясының директорына қатысты қылмыстық істі қарап жатыр. Семён Пакқа Ұлттық қордан 840 млн теңге жымқырды деген айып тағылды. Белгілі болғандай, ол бұл қаржыны «Солтүстік» әлеуметтік-кәсіпкерлік корпорациясы арқылы жабдық сатып алу үшін алған. Бұл қаражат қалай жұмсалды және тараптар не дейді? Orda.kz тілшісі мәселені зерттеді.

Семён Пак – Алматы облысы Қонаев қаласының тумасы. 41 жастағы кәсіпкер екі баланың әкесі.

Оны 2023 жылдың мамыр айында ұстаған. Пакқа аса ірі көлемдегі алаяқтық жасады деген айып тағылды. Алдын ала тыңдауда қорғаушы тарап бұл істі тоқтатуды сұрап, тергеу айыптауға негізделіп жүргізілгенін алға тартты.

Сондай-ақ, қорғаушылар 2021-2025 жылдарға арналған өңірдің әлеуметтік-экономикалық даму жоспары аясында Ұлттық қордан 15 млрд теңге бөлінгенін атап өтіп, кәсіпкердің бюджет қаражатын ұрлауды көздегені туралы тергеу нұсқасымен келіспейтінін мәлімдеді.

Тергеу мәліметінше:

• Пак облыс әкімдігін оның бизнес-жоспарын қаржыландырылатын жобалар тізіміне енгізуге көндірген;
• Осыдан кейін ӘКК-ден 840 млн теңге қарыз алған;
• 2021 жылдың 29 шілдесінде келісімшартқа және оған қосымша келісімге қол қойған.

Кәсіпкер өзінің шынайы ниетін дәлелдеу үшін Петропавлдан құны 227,3 млн теңге тұратын жер учаскесі мен саңырауқұлақ өсіруге арналған жылыжайы бар «Грибной мир» ЖШС-ын сатып алған.

Ол бұл мүлікті 2021 жылғы 29 шілдедегі № 90 кепіл-шарты бойынша ӘКК-ге кепілге қойған.

Алайда тергеу мәліметінше, Пак алған қаражатты мақсатсыз жұмсаған.

Бұл ретте бюджеттік өтінімде 2,66 млрд теңге бекітілгені көрсетілгенімен, кәсіпкерге тек 840 млн теңге ғана берілген.

«ӘКК Оңтүстік Корея компаниясынан сатып алынатын жабдықтың 2 663 100 000 теңгеге бағаланғанын біле тұра, **«Green Smart Farm» ЖШС-на 840 000 000 теңге ғана бөлген. Осылайша, Пак дефолт жағдайына (борыштық шұңқыр) тап болған» деп жазылған сот қаулысында.

Судья Тахмина Собирова қорғаушылардың өтінішін қанағаттандырмай, істі негізгі сот қарауына жіберді.