Ұлттық банк басшысы елімізде доллар бағамы неліктен күрт өскенін түсіндірді

Ұлттық банк төрағасы Тимур Сүлейменов нарықтағы жағдай бірқатар сыртқы және ішкі факторларға байланысты екенін атап өтті, деп хабарлайды Orda.kz.

«Ұлттық валюта бағамы бір доллар үшін 500 теңге деңгейінен асып, биржалық саудада бір доллар 519,7 теңгеге жетіп, 512 теңге деңгейінде жабылды. Бұның түрлі себептері бар, оны жан-жақты талдау керек», — деді Сүлейменов.

Жаһандық деңгейде негізгі қысым АҚШ долларының нығаюынан туындайды, бұл дамушы елдердің валюталарына қысымды күшейтеді:

Доллар тіпті резервтік валюталарға қатысты нығаюда. Мысалы, жапондық иен 5,5%-ға, фунт стерлинг 5,2%-ға, еуро 4,5%-ға әлсіреді. Осы кезеңде теңге 6,6%-ға төмендеді, бұл экономикамыздың мұнай өндіруге көбірек тәуелді екенімен байланысты.

Мұнай нарығындағы жағдай да тұрақсыз.

«Жоғары құбылмалылық ықтимал жеткізілімнің көптігі, АҚШ-тың мұнай жеткізілімдерінің ұлғаюы және Американың жаңа басшылығының басқа да экономикалық шаралары туралы күту жағдайында жалғасуда», - деп қосты ол.

Ел ішінде валютаға сұраныс, әсіресе, доллар үшін 500 теңгелік межеден өткеннен кейін күрт өсті. Соңғы күндердегі биржалық сауда көлемі орташадан екі-үш есе асып түсті, бірақ валюта ұсынысы шектелген күйінде қалды. Бұл алыпсатарлық қысым жасауға жағдай туғызды.

Жағдайды тұрақтандыру үшін Ұлттық банк валюталық интервенциялар жүргізді. 

«Қабылданған шаралар айырбас бағамының күрт ауытқуын реттеуге және нарықты тұрақтандыруға мүмкіндік берді. Қазір доллар 507 теңгеден сатылып жатыр», - деп қорытындылады Ұлттық банк басшысы