Ұлтараздық тудырған павлодарлық төрт жылға сотталды

Павлодар қаласының № 2 Қылмыстық істер жөніндегі соты ұлтаралық араздықты қоздыру және ұлттық ар-намыс пен қадір-қасиетті қорлау фактісі бойынша істі қарады.

Үстіміздегі жылдың 1 қаңтарында мас күйде болған қала тұрғыны WhatsApp мессенджер тобына ұлтаралық араздықты қоздырып, қазақ ұлты өкілдерінің ар-намысы мен қадір-қасиетін қорлауға бағытталған дауыстық хабарламаның үшеуін жолдаған.

Сотталушының кінәсі куәлардың айғақтарымен, құжаттық дәлелдемелермен және сараптамалық қорытындылармен дәлелденеді. Сотталушы өкініп, бас бостандығынан айырмауды өтінді.

«Жасалған құқық бұзушылықтың ауырлығын, кінәсін толық мойындауын және шын жүректен өкінуін, асырауында екі кішкентай баласының болуын ескере отырып, сотталушы төрт жылға бас бостандығынан айырылды», - деді сот.

Қылмыстық кодекстің 174-бабының 1-бөлігі «Ұлтаралық араздықты қоздыру» бойынша 7 жылға дейін бас бостандығынан айыру жазасы қарастырылған.