ҰҚШҰ жарғысына енгізілген өзгерістерді Мәжіліс мақұлдады

Мәжіліс депутаттары Ұжымдық қауіпсіздік шарты ұйымының жарғысына жаңа өзгерістер енгізуді көздейтін төртінші хаттаманы ратификациялау туралы заңды қабылдады.

Бірінші толықтыру ҰҚШҰ-ға мүше мемлекеттердің, атап айтқанда биологиялық қауіпсіздік саласындағы қызмет аясын кеңейтеді.

Екінші толықтыру ҰҚШҰ Ұжымдық қауіпсіздік кеңесінің шешімімен ұйымның Бас хатшысының өкілеттігін мерзімінен бұрын тоқтату мүмкіндігін қарастырады.

Алдағы уақытта құжат Сенаттың қарауына жіберілетін болады.

Айта кетейік, ҰҚШҰ жарғысына 2010 жылғы 10 желтоқсандағы хаттама, сондай-ақ 2018 жылғы 8 қарашадағы екінші және үшінші хаттамалар арқылы бұрын үш өзгеріс енгізілген. 2022 жылғы 26 тамызда ұйымға мүше мемлекеттердің мемлекет басшылары жарғының 8 және 17-баптарына екі толықтыруды көздейтін төртінші хаттамаға қол қойды.