ҰҚШҰ Қазақстан аумағында «Мызғымас бауырластық-2024» оқу-жаттығуларын өткізуді жоспарлады.

9-11 сәуірде ҰҚШҰ ұжымдық күштерімен 2024 жылға жоспарланған бірлескен оқу-жаттығуларды ұйымдастыру және өткізу бойынша келіссөздер жүргізілді.

ҰҚШҰ біріккен штабы бастығының бірінші орынбасары Хасан Калоев бастаған шараға Беларусь, Қазақстан, Қырғызстан, Тәжікстан және Ресей министрліктері мен басқа да ведомстволарының, сондай-ақ Хатшылық пен ҰҚШҰ Біріккен штабы өкілдері қатысты.

Тараптар бірлескен оқу-жаттығуларды өткізу мәселелерін, басқару органдары мен әскерлердің құрамын, сондай-ақ басшылықты ұйымдастыру мен қамтамасыз ету мәселелерін талқылады.

Биылғы жылы бірқатар іс-шаралар жоспарланған. Қырғызстанда ҰҚШҰ жедел әрекет ету күштерінің «Өзара іс-қимыл-2024» командалық-штабтық оқу-жаттығуы, «Іздеу-2024» барлау оқу-жаттығуы және ҰҚШҰ әскерлерін «Эшелон-2024» материалдық-техникалық қамтамасыз ету оқу-жаттығулары өтеді.

Қазақстанда ҰҚШҰ бітімгершілік күштерімен «Мызғымас бауырластық-2024» командалық-штабтық оқу-жаттығуы өтеді.

Тәжікстанда Орталық Азия өңірінің жедел әрекет ету күштері қолбасшылығының жедел кеңесі және Орталық Азия жедел күштерінің бөлімшелерімен бірлескен «Рубеж-2024» оқу-жаттығуы өтеді.

Барлық іс-шаралар ҰҚШҰ әскерлерінің мақсатты міндеттерін бірлесіп орындауға дайындығын сақтау бойынша жоспарға сәйкес өткізілетін болады.