Украинаның Херсон облысы да жеке республика болмақшы  

Украинаның Херсон облысында «халық республикасын» құру туралы референдум дайындалып жатыр.

Херсон облыстық кеңесінің депутаты Сергей Хланның хабарлауынша, депутаттарға Херсон Халық Республикасын құруға келісім беру туралы қоңыраулар түсіп жатыр.

Facebook желісінде Сергей Хланның жазбасы пайда болды, онда жергілікті депутаттарға телефон қоңыраулары түсіп жатқаны туралы жазылған. Телефон арқылы олар ДХР және ЛХР сияқты  ХХР құруға келісім сұрайды.

«Құрметті әріптестер, сіз өз шешіміңіздің салдарын түсінетініңізге сенімдімін. ХХР құру біздің өңірді өмірі мен болашағы жоқ үмітсіз құрдымға айналдырады. Оларға дауыс бермеңіз! Оларға ХХР-ды заңдастыруға мүмкіндік бермеңіз!»  деп жазды Сергей Хлан.

Херсонды орыс әскерлері басып алды. Бұған дейін хабарлағанымыздай, жергілікті тұрғындар Ресей билігінің Украина қалаларын басып алуына наразылық білдіруге шыққан болатын.