Украинаға қарсы соғысқа аттанған қазақстандықтардың тізімі жарияланды

Украинаға қарсы соғысқа қатысқан қазақстандықтар тізімінде шамамен 600 азаматтың есімі жазылған, деп хабарлайды Orda.kz.

Ресей үшін соғысып жатқан қазақстандықтардың аты-жөнін Украинаның Қорғаныс министрлігі мен Бас барлау басқармасы жетекшілік ететін «Хочу жить» орталығы жариялады.

Деректеге сүйенсек, 2022 жылдан бері 661 қазақстандық соғысқа аттанған, бүгінде оның 78-і соғыста қаза тапты. Ақпарат көзі Ресей армиясы қолбасшылығының анонимді өкілдері деп аталады.

«Айта кетейік, соғысқа жалдану Қазақстан Республикасында қылмыс. Екі ел арасындағы соғыстан аман қайтқан азаматтар үйіне оралғаннан кейін мүлкі тәркіленіп, 12 жылдан 17 жылға дейінгі бас бостандығынан айырылады», деп мәлімдеді «Хочу жить» орталығы.

Сондай-ақ орталық Ресей үшін соғысып жатқан қазақстандықтар туралы бұл ақпарат Украинаға қарсы шетел азаматтары туралы бірінші тізім екенін де жазды.