Украинада қазақстандықтардың жеке деректерін таратқан сайт бұғатталды

Дерекқорда 200 млн ТМД азаматтарының телефондары, аты-жөні және олардың тіркелген жері туралы ақпараттар болған.

Украинаның құқық қорғау органдары ТМД елдерінен - ​​Молдовадан, Беларусьтен, Қазақстаннан және т.б. 200 миллионға жуық адамның жеке мәліметтерін заңсыз таратқан ірі веб-ресурстың жұмысын бұғаттады. Мұндай ақпаратты Украина Ішкі істер министрлігінің сайты хабарлады.

«Бірлескен іс-қимылдар нәтижесінде 200 миллионға жуық адамның, оның ішінде Украина, Молдова, Беларусь, Қазақстан және басқа да ТМД елдерінің азаматтарының жеке деректері заңсыз таратылған ең ірі веб-ресурстардың бірі локализацияланды және тоқтатылды» делінген хабарламада.

Анықталғандай, аталған сайтта азаматтардың телефондары, тегі, аты мен әкесінің аты, олардың тіркелген жері, ал кейбірінің тіпті көлік құралдарын пайдалануға байланысты көрсетілетін әкімшілік қызметтер туралы ақпараттары болған.

Ішкі істер министрлігі полицияның жеке өмірге қол сұғылмау фактісі бойынша қылмыстық іс қозғағанын хабарлады.