Украинада 10 мыңнан аса тұрғын қаза тапқан — БҰҰ

Біріккен Ұлттар Ұйымы Ресей-Украина соғысының нәтижесінде соңғы екі жылда 10 мыңнан аса украиналық бейбіт тұрғынның қаза тапқанын мәлімдеді, деп хабарлайды Orda.kz порталы DW-ге сілтеме жасай отырып.

БҰҰ-ның адам құқықтарын бақылау миссиясының құжатталған деректерінде Украинада 10 582 адамның қаза тауып, 19 875 азаматтың жарақат алғаны мәлімделген.

Қайтыс болғандардың басым бөлігі Украинаның шығыс облыстарынан. Алайда БҰҰ құрбандардың нақты саны одан да көп болуы мүмкін екенін мәлімдеді.

Бұл күнде халықтың 40 пайызға жуығы гуманитарлық көмекке зәру. Ал елдің 2,2 миллион азаматы көрші мемлекеттерге бас сауғалаған.

Еске сала кетейік, Ресей Украинаға қарсы өз әскери қимылдарын 2022 жылы 23 ақпаннан 24 ақпанға қараған түні бастаған еді. Елдер арасындағы соғыс қазір де жалғасуда.