Украина әскері Қадыров полкінің командир орынбасарының көзін жойды

Ахмат Қадыров атындағы арнайы полктің 4-ші батальоны командирінің орынбасары, подполковник Заур Димаев Украинада Камышеваха елді мекені үшін болған шайқастарда қаза тапты.

Бұл туралы Baza telegram-арнасы хабарлайды.

Арнаның хабарлауынша, арнайы полк сарбаздары пайдаланған «УАЗ Патриот» көлігі Камышевахта Украина әскерінің шабуылына ұшыраған. Бұл 31 мамыр күні болатын.

Шешенстандық екі полиция қызметкері қаза тапты. Қаза тапқандардың бірі – 45 жастағы Заур Димаев. Соққының салдарынан 4-ші батальон командирінің орынбасары мен көлік жүргізушісі оқиға орнында көз жұмды.

Тағы төрт сарбаз жараланды.

Еске салсақ, 25 мамыр күні Украина Қарулы Күштері Қадыров атындағы арнайы полктың екінші ротасының командирі, полиция капитаны Асвад Ыдырысовтың көзін жойды.

Оған дейін, Украина Қарулы күштері Киев облысындағы Гостомель маңындағы «қадыровтық» полкті артиллериямен шабуылдады.

Қадыров гвардиясының 141-ші мотоатқыштар полкінің бастығы Магомед Тушаевтың көзі жойылды. Гостомель маңында (Киев облысы) «қадыровтықтармен» шайқас кезінде Украина қарулы күштері шешен әскерилеріне ауыр соққы жасады.