Украина Ресейге келіссөз жүргізуді ұсынды

Украина Ресейге «Азовсталь» зауытының жанында келіссөз жүргізуді ұсынды. «Азовсталь» зауыты – Ресей әскері басып алған Мариупольдегі ең соңғы бекініс.

- Мариуполь қаласындағы жағдай өте ауыр, әскеріміз бейбіт тұрғындарды қорғап жатыр. Мыңнан астам адамның арасында қариялар мен балалар бар. Біз Ресейге «Азовсталь» зауытының тура іргесінде арнайы келіссөз жасауды ұсындық. Мақсат – оларды Пасха кезінде оқ атуды дереу тоқтату туралы келісімге келу және сарбаздарымызды Ресейдің тұтқынға түскен барлық әскеріне айырбастауға шақыру, - деді Украина президенті кеңсесінің кеңесшісі.

РФ қорғаныс министрлігінің өкілі Ресейдің қарулы күштері дәлдігі жоғары зымыран атып, әскери аэродромда орналасқан логистикалық терминалды істен шығарғанын айтты.

- Ресейдің қарулы күштері дәлдігі жоғары зымыран атып, Одесса маңындағы әскери аэродромда орналасқан логистикалық терминалды істен шығарды. Онда АҚШ пен Еуропа елдерінен әкелінген қару-жарақтың ірі көлемі сақталған, - деді Игорь Конашенков.