Украина Ресейдің тағы бір көпірін қиратты

Украина Курск облысындағы екінші Ресей көпірін қиратқанын мәлімдеді.

Бұл туралы BBC хабарлады.

Украина бір апта ішінде Ресейдің Курск облысына басып кіріп, екінші стратегиялық көпірді қиратқанын айтты. Жексенбі күні украина әскерилері Сейм өзені арқылы өтетін Званное ауданындағы көпірге соққы жасағанын сәтті бейнелеген әуе түсірілімдерін жариялады.

Бірнеше сағат өткен соң Украина президенті Владимир Зеленский Курскіге жасалған әскери операцияның мақсаты ресейлік шабуылдарды тоқтату үшін «буферлік аймақ» құру екенін алғаш рет мәлімдеді.

Украина соңғы екі апта бойы Ресей аумағында 2022 жылы Мәскеу Украинаға басып кіргелі бері ең ірі шабуылдарын жасап жатыр. Украина Әуе күштерінің қолбасшысы генерал-лейтенант Николай Олещук әлеуметтік желіде «тағы бір көпір кетті» деп жазып, соққының бейнематериалдарын жариялады.

«Украинаның әуе күштері дәл авиациялық соққылармен қарсыластың логистикалық мүмкіндіктерін жоюды жалғастырып жатыр. Бұл соғыс барысына айтарлықтай әсер етеді», – деді генерал Олещук. 

Бейнематериалда көпірден көтерілген үлкен шаң бағанасы көрініп тұр және көпірдің бір бөлігі қирағаны байқалады. Соққының нақты қашан жасалғаны белгісіз.

 Апта басында Украина Глушково қаласына жақын жерде Сейм өзені арқылы өтетін тағы бір көпірді қиратты. Бұл көпірді Кремль өз әскерлерін қаруландыру үшін пайдаланғанып отырған болатын. Украина әскері Ресей шекарасынан өткеніне екі аптадан соң, олардың бұл аймақта тұрақтайтыны айқын болды.

Жексенбі күні кешкі мәлімдемесінде ол: «Курск облысындағы операциямыз Ресей әскеріне, мемлекетіне, олардың қорғаныс өнеркәсібі мен экономикасына залал келтіріп жатыр», – деп мәлімдеді. 

Президент кеңесшісі Михаил Подоляк Украина Ресей жерін жаулап алуды көздемейтінін, бірақ Ресейді келіссөзге келуге мәжбүрлегісі келетінін айтты. Мәскеу бұл әрекеттерді үлкен арандатушылық деп атап, «лайықты жауап» беретінін мәлімдеді. Украина Ресейдің батыс аумағына кіріп жатқанда, ресейлік әскерлер де Украинаның шығысындағы бірнеше ауылды басып алды. Сонымен қатар, МАГАТЭ басшысы Рафаэль Гросси Запорожье АЭС-іне жақын жерде дрон соққысынан кейін жағдайдың нашарлағанын айтып, ядролық қауіпсіздікке алаңдаушылық білдірді.

МАГАТЭ соққының кімнен болғанын анықтамады, бірақ оның Запорожье аймағындағы тобы дронмен жасалған соққыдан зақым келгенін айтты. Станция екі жылдан бері электр энергиясын өндірмей келеді. Ал оның алты реакторы сәуір айынан бері тоқтап тұр.