Украина Ресейдің "Цезарь Куников" әскери кемесін батырып жібергенін мәлімдеді

Украина әскері бас штабының хабарынша, Ресей кемесі Украинаның теңіздегі аумағына кіріп кеткен, деп хабарлайды Orda.kz порталы Azattyq-қа сілтеме жасай отырып.

Ресей қорғаныс министрлігі әзірге кеменің батып кеткені жайлы хабарға қатысты ештеңе демеді. Бұның алдында ведомство Қара теңізде алты дрон қағып түсіргенін хабарлаған болатын.

Соғыс уақытында екі елдің мәлімдемелерін тәуелсіз дереккөздер арқылы тексеру мүмкін емес.

Ресей кемесінің батып кеткенін алғаш болып Украина барлау қызметіне сілтеме жасап "Украинская правда" сайты  хабарлады. Сайттың мәліметінше, кемені дрондармен атқылаған. Ал "Крымский ветер" телеграм-арнасы кеме батқан маңнан сурет жариялаған. Фотода жарылыстан соң будақтаған түтін мен құтқару қайықтары көрінеді.

"Два майора" телеграм-арнасы экипаж тірі деп хабарлады. Алайда "Крымский ветер" жариялаған фотода кеме маңында тікұшақ ұшып жүргені байқалады.

Еске сала кетейік 2023 жылы наурызда Украина қарулы күштері Ресейдің "Орск" әскери кемесін істен шығарған болатын.