Украина парламенті Ресей вакциналарына тыйым салды

Украина парламенті, яғни жоғарғы Рада депутаттары Ресейде шығарылған коронавирусқа қарсы вакциналарға тыйым салу туралы заң жобасын мақұлдады. Оған депутаттардың көбі қарсы дауыс берді.

Сонымен қатар жоғарғы Рада АҚШ, Еуропа одағы, Қытай, Үндістан және Мексикада шығарылған вакциналарды жеделдетіп тіркеу процедурасын мақұлдады.

Украинада жаппай коронавирус вакцинасын салу науқанын әлі бастаған жоқ. Үкімет ақпанда америкалық Pfizer мен германиялық BioNTech бірлесіп жасаған вакцинаның 100-200 мың дозасын алуды жоспарлап отырғанын хабарлады.

Бұған дейін де Украина өкіметі Ресейде жасалған вакцинаны қолданбайтындарын айтқан.

«Ресей вакцинасын Украинада ешкім тіркемейді», - деді Украина денсаулық сақтау министрі Максим Степанов 29 қаңтарда өткен арнайы брифингте.

2014 жылы Ресей Украинаның Қырым түбегін заңсыз аннесиялағалы бері Киев пен Мәскеу арақатынасы өте нашар. Оның үстіне Украина шығысындағы сепаратистерді Ресей қолдайды деген де сенім бар. Донбасс аймағындағы қарулы қақтығыс салдарынан 14 мыңнан астам адам қаза тапқан.

Соңғы күндері Украинада коронавирус жұқтырған, аурухана жатқызылған және бұл дерттен көз жұмған науқастар саны азайған. Былтырдан бері Украинада 1,2 млн адам Covid-ке шалдығып, 22 мың адам көз жұмған.