Украина миллионері Қазақстанда іздеуде

Украинаның долларлық миллионері Вадим Машуров Қазақстан Республикасында іздеуге жарияланды, деп хабарлайды Orda.kz Қазақстан құқықтық статистика және арнайы есепке алу мекемесіне сілтеме жасап.

Хабарламада бұл оқиға 2023 жылы 28 желтоқсанда Алматы қаласында тіркелгені айтылған. Іздестіру бастамашысы – Қазақстанның Қаржы мониторингі агенттігі. Іздестіру жұмыстарын Алматы экономикалық тергеу департаменті жүргізіп жатыр.

РБК Украина басылымының хабарлауынша, 26 жастағы Вадим Машуров IT-кәсіпкер, Instime.World (Instagram аккаунтын жылжыту және монетизациялау қызметі) компаниясының негізін қалаушы. Ол Украинадағы ең табысты жас кәсіпкерлердің бірі ретінде танылды. 

Бұқаралық ақпарат құралдары Машуровтың «Sincere Systems» компаниясын құруға қатысқаны туралы жазады. Өткен жылдың шілде айында Қазақстанның Қаржы мониторингі агенттігі ұйымды қаржылық пирамидалар тізіміне енгізген болатын.

ҚМА мәліметі бойынша, 2020 жылдан бері «Sincere Systems» криптовалюта биржаларымен ынтымақтаса жұмыс істеген компанияның атын жамылып, азаматтардан қаражат жинап келеді. Қазақстандықтардан жиналған қаражат көлемі 215 миллион теңге болған. Қаржы пирамидасының басшысы 6 жылға сотталды.