Украина Мәскеуді Мариупольдегі балалар ауруханасын бомбалады деп айыптады

Ресей әскерлері мен сепаратистік «ДХР» содырларының қоршауында тұрған Украинаның Донецк облысындағы үлкен қала Мариупольде бомбалы шабуылдан балалар ауруханасы қиратылды.

Қала билігі мен Украина президенті Владимир Зеленский Ресейді азаматтық нысанды бомбалады деп айыптады. Зеленский жариялаған видеода ғимараттың қирап жатқанын көруге болады.

Бомбадан зардап шеккендер туралы хабарланбады. Сондай-ақ, аурухана Ресей шабуылы басталғалы жұмыс істеп тұрғаны туралы нақты ақпарат жоқ. Украина президенті Владимир Зеленский үйінділер астында адамдар бар деген болжам жасады.

«Ресей әскерлерінің перзентханаға тікелей соққысы. Үйінді астындағы адамдар. Үйінді астында қалған балалар. Бұл жауыздық!» Зеленский тағы да НАТО елдерін Украинаның үстінен «әуе кеңістігін жабуға», яғни ресейлік ұшақтар мен зымырандарды атып түсіруге шақырды (НАТО елдері Ресеймен тікелей қақтығысудан қорқып, мұны істеуден бас тартты).

«Украинская правда» газеті жарылыс ошағы перзентхана мен балалар бөлімшелерінің арасында болғанын нақтылады.

Ресей Қорғаныс министрлігі аурухананың бомбалануына қатысты пікір білдірмеді. Ведомствоның ресми хабарларына қарағанда, ресейлік әскерилер тұрғын үйлер мен азаматтық нысандарға оқ атпайды. Сонымен қатар, үйлердің, мектептердің және басқа да әскери емес нысандардың қирау фактілері аз емес. БҰҰ-ның соңғы мәліметтері бойынша, 24 ақпанда Украинаға басып кіргелі бері кем дегенде 1424 бейбіт тұрғын қаза тапты, жараланды.