Украина Беларусьті Ресей жағына шабуыл жасады деп айыптады

Украина Беларусьті Ресей жағына шабуыл жасады деп айыптап отыр.

«Сағат 05:00 шамасында Ресей мен Беларусь аймағындағы Украинаның мемлекеттік шекарасына Беларусьтің қолдауымен ресейлік әскерлер шабуыл жасады. Шекара бөлімшелеріне, шекаралық техника мен бақылау бекеттеріне шабуыл артиллерия, ауыр техника және атыс қаруын қолдану арқылы жүзеге асты. Бұл Луганск, Сумы, Харьков, Чернигов және Житомир облыстарының аумақтарында болып жатыр» делінген Украина шекара қызметінің бейсенбі күні таратқан хабарламасында.

Сонымен қатар, украиндық әскерилердің айтуынша, шабуыл Қырым аумағынан жасалған.

«Жаудың диверсиялық-барлау топтарының жұмысы да тіркелді. Шекаралас аймақтардағы жағдайға байланысты шекарашылар Украина қарулы күштерімен және Украина Ұлттық гвардиясымен бірлесе отырып, жауға оқ жаудырады. Шекарашылардың жарақат алғаны туралы ақпарат нақтыланып жатыр» делінген хабарламада.

Еске салсақ, бұған дейін Ресей президенті Владимир Путин Украинада арнайы әскери операция жүргізу, сол арқылы оған соғыс жариялау туралы шешім қабылдағанын мәлімдеген. Украинаға басып кіру оның ресейлік теледидарда сөйлеген сөзі аяқталмай тұрып басталды. Шабуыл теңізден, құрлықтан және әуеден жүзеге асырылды. Украинада әскери жағдай енгізілді. Қазақстанда Украинадағы соғысқа байланысты әуе жолаушыларына сенім телефоны іске қосылды. Сонымен қатар, қазақстандық әуе компанияларына Украинаның үстінен ұшуға тыйым салынды. Сондай-ақ Ресей Украинамен шекаралас қарулы қақтығыстар аймағындағы барлық елдерге әуе кеңістігін жабуды ұсынды.