ҰҚК Қонаевтағы аға прокурордың ұсталғанын растады

Алматы облысы Балқаш ауданының аға прокуроры Қанат Сонабаев алаяқтық жасады деген күдікке ілінді.

Оны 12 ақпанда Қонаев қаласында Ұлттық қауіпсіздік комитетінің облыстық департаменті мен Бас прокуратураның ішкі қауіпсіздік басқармасы қызметкерлері ұстаған.

«Сонабаевқа қатысты ҚР ҚК-нің 24-бабының 3-бөлігі «Қылмысқа дайындалу және қылмысқа оқталу» бойынша, сондай-ақ ҚР ҚК 190-бабының 3-бөлігі «Алаяқтық» бойынша сотқа дейінгі тергеу амалдары жүргізілуде» деп түсіндірді Ұлттық қауіпсіздік комитетінің баспасөз қызметі.

Ведомство ҚР Қылмыстық-процестік кодексінің 201-бабының 1-бөлігіне сәйкес жүргізілген тергеу мәліметтері жария етуге жатпайтынын түсіндірді.