ҰҚК Қазақстанның үш қаласында радикалды діни топ мүшелерін ұстады

Ұлттық қауіпсіздік комитеті Қазақстанның үш қаласында радикалды діни топты залалсыздандырды.

Бұл туралы Ұлттық қауіпсіздік комитетінің баспасөз қызметі хабарлады.

«2023 жылғы 15 қарашада Ұлттық қауіпсіздік комитеті Бас прокуратураның келісуімен сотқа дейінгі тергеу шаралары аясында Астана, Атырау және Жезқазған қалаларында радикалды діни топтарды  залалсыздандырды» делінген хабарламада.

Терроризмді насихаттады, сондай-ақ экстремистік топ құрды, оған жетекшілік етті және оның қызметіне қатысты деген күдікпен 12 адам ұсталды.

Тергеушілердің айтуынша, олар Қазақстандағы зайырлы жүйені құлату мақсатын көздеген. Ол үшін экстремистік идеологияны таратып, жаңа жақтастарын жинады. Олардың үйлерінен тыйым салынған әдебиеттер мен басқа да заттай айғақтар тәркіленді.

«Топтың бірқатар мүшелері ауыр қылмыс, соның ішінде полиция қызметкерін өлтіру, тонау,  ұрлық және зорлау сияқты қылмыстарды жасағаны үшін сотталған» деп хабарлады Ұлттық қауіпсіздік комитеті.