Ұйымдасқан қылмыстық топтан 2 миллиард теңгенің заты тәркіленді

Қазақстанда бір жылда ұйымдасқан қылмыстық топтардан  2 миллиард теңгенің 40-тан астам көлігі мен мүлкін тәркілеген, деп хабарлайды ҚР Ішкі істер министрлігінің ресми интернет-ресурсы.

— Қылмыстық жауапкершілікке ұйымдасқан қылмыстық топтың 155 мүшесі, оның ішінде олардың 24 жетекшісі тартылды. Тергеу жүргізіліп жатқан қылмыстық істер аясында 40-тан астам беделді маркалы автокөлік, 18 миллион теңгенің қолма-қол ақшасы және құны 2 миллиард теңгеден асатын басқа да мүлік тәркіленіп, бұғатталды, - деді ІІМ Ұйымдасқан қылмысқа қарсы күрес департаментінің өкілі Қуандық Алпыс.

Ішкі істер министрлігінің мәліметінше, өткен жылы 300-ден астам бопсалау фактілерінің жолы кесілген, оның ішінде бизнес өкілдеріне қатысты істер де бар. Ұйымдасқан қылмыстық топтың іздеуде жүрген 15 мүшесі ұсталды.

Қыркүйек айында БАӘ-де қаңтар оқиғасы кезіндегі тәртіпсіздіктерге тікелей қатысы бар ұйымдасқан қылмыстық топтың белсенді мүшесі ұсталғаны хабарланды.

Сондай-ақ Ішкі істер министрлігі 2022 жылдың қыркүйегінде ҰҚК-мен бірлесіп Алматы, Атырау, Тараз және Петропавл қалаларында Қазақстанға шекараны кеңейту мақсатында келген Әзірбайжан мен Грузия азаматтарын ұстау бойынша ауқымды операция жүргізілгенін айтты.