Ұйымдасқан қылмыстық топтың жетекшісі Польшадан Қазақстанға экстрадицияланды

Ұйымдасқан қылмыстық топтың жетекшісі ретінде Украина азаматы Польшадан Қазақстанға экстрадицияланды.

Бұл туралы бас прокуратураның баспасөз қызметі хабарлады.

«Бүгін Бас прокуратура мен Ішкі істер министрлігінің қызметкерлері Қазақстанның Польшадағы Елшілігінің көмегімен трансұлттық ұйымдасқан топ құрып, оған жетекшілік еткені үшін қылмыстық жауапкершілікке тартылған Украина азаматын Польша Республикасынан экстрадициялады. 2022 жылы ол құрған қылмыстық топ Қазақстанда аса ірі көлемде психотроптық заттарды өндірумен және сатумен айналысқан» делінген хабарламада.

Тәркіленген заңсыз заттардың көлемі 1 тоннадан асқан, ал оның қара нарықтағы жалпы құны 1,5 млрд теңгеден асады.

«Осы қылмыстарды жасағаннан кейін ұйымдасқан топ мүшелері ұсталып, оның жетекшісі қашып, халықаралық іздеуде болды.2023 жылдың тамыз айында күдікті Польша аумағында анықталды. Қазақстан Республикасы Бас прокуратурасының талабы бойынша ол экстрадицияланып, қазіргі уақытта Астанадағы тергеу изоляторына қамалды. Айыпталған қылмыстарды жасағаны үшін мүлкі тәркіленіп, 15 жылдан 20 жылға дейінгі мерзімге бас бостандығынан айыру немесе өмір бойына бас бостандығынан айыру түріндегі жаза қарастырылған» делінген хабарламада.