Уханьдағы ДДСҰ миссиясы мүшесі: Қытай коронавируc туралы барлық мәліметтерді бермеді

Қытай Дүниежүзілік денсаулық сақтау ұйымының мамандарына коронавирустың пайда болуы туралы негізгі ақпаратты беруден бас тартуда. Covid-19 тудыратын коронавирус алғаш рет 2019 жылы табылған Ухань қаласына аттанған халықаралық зерттеу миссиясы қатысушыларының бірі, австралиялық микробиолог Доминик Двайер бұл туралы Reuters, New York Times және Wall Street Journal тілшілеріне берген сұхбатында хабарлады.

Ғалымның айтуынша, ДДСҰ сарапшылары Қытайға зерттеу жүргізу үшін келгенде, Қытай билігі оларға стандартты тәжрибеге жататын - алғашқы пациенттер туралы бастапқы деректерді көрсетпеген. Оның орнына ғалымдар сұралған деректердің қысқаша мазмұнын ғана алған.

Қытай үкіметі ғалымның пікіріне  әлі түсініктеме берген жоқ. Алайда арнайы іссапармен келген ДДСҰ тобына Қытай Денсаулық сақтау министрлігі тарапынан толық қолдау көрсетіліп жатыр деп сендіреді. АҚШ шенеуніктері ДДСҰ есебі оларды қатты алаңдататынын айтып, Қытайды сарапшыларға Covid-19 пайда болуының алғашқы кезеңдері туралы қажетті ақпаратты беруге шақырды.

ДДСҰ мамандары Қытайға қаңтардың соңында ұшып барып, сонда төрт апта болды, оның алғашқы екі аптасын карантинде өткізді. Өткен аптада ДДСҰ тобы тергеудің алғашқы нәтижелерімен бөлісті. Атап айтқанда, олар коронавирустың зертханада жасалуы туралы ақпаратты растайтын айғақтар аз деді.

«Іссапар барысы туралы есеп келесі аптаның өзінде-ақ пайда болуы мүмкін және онда алғашқы жағдайлар туралы толық мәлімет ала-алмағандығымызды көрсетеміз», деді профессор Двайер.

2019 жылдың соңында Уханьда коронавирус табылғаннан бастап, бүкіл әлемде оның салдарынан 106 миллионнан астам Covid-19 оқиғасы тіркелген. Осы диагнозбен 2,3 миллионнан астам адам қайтыс болды.